Dəvəli ASC

“Dəvəli” müstəqil hüquqi şəxs olaraq, “Mülki Məcəllə”yə, “Səhmdar Cəmiyyətləri haqqında Qanun”a, öz Nizamnaməsinə və qüvvədə olan digər qanunvericilik aktlarına uyğun olaraq fəaliyyət göstərir.

Cəmiyyət Azərbaycan Respublikası Ədliyyə Nazirliyində 18.12.2001-ci il tarixdə, D-3334 saylı şəhadətnamə ilə dövlət qeydiyyatına alınmışdır. Təşkilati-hüquqi forması açıq səhmdar cəmiyyətdir. Bakı şəhəri, Yasamal rayonu, 2-ci Alatava, Yuxarı Dairəvi küçəsi 212 ünvanında yerləşir.

“Dəvəli” çoxsahəli bir istehsalat müəssisəsidir. Burada müxtəlif sahələr üzrə bacarıqlı mütəxəssislər: məhşur rəssamlar, nəqqaşlar, daşyonanlar, heykəltəraşlar, metal işləri üzrə ustalar, dəzgah və avadanlıqlar üzrə mühəndislər çalışırlar.

Cəmiyyətin öz gücü ilə Abşeron yarımadasında, Bakıdan 70-80 km. aralıda yerləşən Gülbax (Güldağ) dağındakı karxanalardan daşları blok şəklində çıxarılıb istehsal sexlərinə gətirilir və müxtəlif növ məmulatlar hazırlanır. Tərkibi 70-80% kalsium korbonatdan ibarət olan və tərkibində digər kimyəvi komponentlər olmayan Gülbax daşı binaların arxitektur, klassik və modern üslubda üzlənməsində, pilləkan məhəccərlərinin sürahi və baylansların hazırlanmasında geniş istifadə olunur. 

Azərbaycanda istehsal olunan daşların bütün növləri ilə yanaşı “Dəvəli” ASC digər xarici ölkələrdə: – Ukrayna Respublikasından, Rusiya Federasiyasından, İran İslam Respublikasından, Çin Xalq Respublikasından, Cənubi Afrikadan, Hindistandan, Braziliyadan, Türkiyədən, İtaliyadan, İspaniyadan, Yunanıstandan, Malayziyadan, Vietnamdan, Pakistandan, Əfqanıstandan, Dubaydan, Misirdən, Zimbabve və s. ölkələrdən müxtəlif çeşidli qranit və mərmər daşları xammal, yarımfabrikat və hazır məhsul şəklində mallar alır.

Cəmiyyətin istehsal sexində sifarişlərə uyğun olaraq, müxtəlif növ qranit və mərmərdən heykəl, büst və qəbirüstü abidələrin hazırlanması, istənilən çeşiddə tikinti üçün üzlük plitələrin hazırlanması işləri yerinə yetirilir. Evlərin fasad hissələrinin əhəng daşı (ağlay), mərmər, qranit və başqa növ daşlarla üzlənməsi, yüksək mərtəbəli binalarda vestibül və pilləkanların müxtəlif çeşidli qranit, mərmər və travertin plitələrlə üzlənməsi, döşəmə və divarların Voter Jet (su ilə kəsən) dəzgahda kəsilmiş müxtəlif ornamentli şəbəkə və fiqurlarla işlənməsi və .s. bu kimi işlərin keyfiyyətlə və vaxtında yerinə yetirilməsi üçün təcrübəli ustalardan ibarət olan əmək kollektivinin əsas məqsədidir. Eyni zamanda cəmiyyətin mexaniki sexində daş emalı üçün lazım olan bəzi dəzgah və avadanlıqlar da hazırlanır.

Cəmiyyətin əmək kollektivinin qarşısına qoyduğu əsas vəzifə dinamik inkişaf yolunu davam etdirməkdir.